Ne Boten Magjike Te Henrit

Është fakt që rrugëtimi i këtij libri sapo ka filluar, por gjithashtu është fakt që ky rrugëtim ka nisur prej kohësh. Qyshkur një djalë i vogël dëshironte të dëgjonte pambarimisht përrallat e shumta, të gjata a të shkurtra, por tejet të larmishme që dinte mami; në fakt, që mami i krijonte për të. Sipas vendeve që atij i ngjallnin interes, sipas kafshëve që e magjepsnin, sipas situatave me të cilat filloi të përballej në ditët e para të kopshtit, sipas nevojës së tij të çastit dhe sipas dëshirave të shprehura me plot gojë. Dhe një ditë, kur djali i vogël u rrit paksa, mami përzgjodhi më të bukurat e përrallave që kishte treguar për t’i bërë bashkë në këtë libër, në mënyrë që t’i ndante me çdo fëmijë, duke e bërë pjesë të botës së tyre, pjesë të botës magjike të Henrit. Në botën magjike të këtij libri me përralla mund të ndodhë gjithçka. Imagjinoni, në një ditë vere mund të takoni një oktapod që ju hap zemrën për problemet e tij, ndërsa një natë dimri mund të takoni babagjyshin e Vitit të Ri, që ju kërkon ta ndihmoni për të shpërndarë dhuratat e Vitit të Ri për fëmijët.
Në këtë botë magjike, nëse humbet rrugën për në shtëpi, kafshët bëhen udhërrëfyesit e tu e xixëllonjat të ndriçojnë rrugën gjatë natës. Në magjinë e këtyre përrallave mund të kërcesh në një ballo ku marrin pjesë të gjitha kafshët nënujore, por të duhet një veshje balloje. Mendo si mund të duken balenat me smoking, ose gaforret me fustan.
Mund të marrësh këshilla nga një elefant që është shumë i zgjuar e fatmirësisht bëhet miku yt, por mund të ndodhë që t’ju ndihmojë një breshkë uji e cila njeh magjinë e bukurisë së përjetshme. Në këto përralla mund të shohësh sesi luajnë së bashku një delfin dhe një peshkaqen pa e ditur se ata janë armiq, sepse dëshira për të luajtur është më e madhe se çdo lloj frike. Sa bukur të përfshihesh në botën e Henrit, ku mund të ndodhë gjithçka, ku mund të takosh gjithkënd sepse ajo është botë magjike. Ju ftojmë të bëheni edhe ju pjesë e saj.