Njeriu Perballe Perbindeshit

Kur mbaron së lexuari tre dosjet e Musa Sines, dosjen e Burgut të Parë, dosjen Formulare të Sigurimit të Shtetit dhe dosjen e Burgut të Dytë kupton se sa i vogël dhe i pavlerë është njeriu dhe jeta e tij përballë makinës së përbindëshme të diktaturës, dhe sa të lehtë e ka diktatura të rrëmojë, të rëndojë e të rrënojë jetët e njerëzve, qofshin këta edhe më të thjeshtët, por të indeksuar si armiq të betuar të saj…
Musa Sina ishte njeri i thjeshtë, i këndshëm e i pashkollë. E vetmja shkollë që mundi të kryejë, ishin 20 vitet e burgut…
MUSA SINA (1930-1994)
E gjithë jeta e Musa Sinës, shkoi në burg e internim, pra, ai i përkiste kategorisë së burgaxhinjve klasikë, një cilësor diskriminues i komunizmit mbytës. Fjalën “klasik” e them në kuptimin veteran burgjesh, dmth burg i pandërprerë nga fillimi deri në mbarim të sistemit: (1945-1989)… Burg politik me ngarkesë të plotë.
Jozef Radi
Jeta e Musës mund të karakterizohet edhe si integrale, por s’është e drejtë të thuhet se ka qenë krejt monotone. Nëse leksiku i shqipes s’ka fjale tjetër, lëmë mënjanë 15 vitet e fëmijërisë (1930-1945, nga dita e lindjes deri kur filloi “riedukimin” komunist), për 45 vitet e socializmit enverist, jeta e tij, (nëse mund të quhet “jetë”), ishte alternuar në dy pamjet e saj, thuajse të një ngjyre, zeza-me grinë e errët: internim-burg dhe anasjelltas, ndarë në afate thuajse të barabarta. Fundi fundit, jetë dyngjyrëshe…?! Hoh!! Qysh nga mosha kur njeriu gjorë, si i thonë fjalës, bie në mend të veta, jeta e tij, e tëra: terr e zi!
Prof. Bajram Xhafa